توك صغيـره وابتديتـي تحبيـن
من علمك ليل السهر ياصغيـره ؟
بدري عليك العشق يابنت هاللحين
حرام هذا القلب وشهو مصيـره ؟
انتي بريئه في الهوا ليه تشقيـن ؟
دروبه طـوال ٍ عليـك وعسيـره
رحتي بدرب ٍ ماله اصلا ً عناويـن
وانتي مشاويرك من اول قصيـر ه
ياطفلة ٍ حبّت وراحت على ويـن ؟
عقب الهنا ذقتي الحيـاه المريـره
وينك ووين الحب والشوق والبين ؟
عنّيتي عيونك وصرتـي سهيـره
امحق تسلّـي كـان ودّك تسلّيـن
الورد لولا اللون وشهو عبيـره ؟
خلّيتي دروسك وصرتـي تحاتيـن
الدرس في ديره وصرتـي بديـره
وصرتي بعد من غير هذا تغاريـن
والمشكله يابنـت منتـي خبيـره
نصيحتي لـك كـان ودّك ترديـن
يـم السعـاده والحيـاه المثيـره
خلّـك بجـو العايلـه لا تعـدّيـن
امك وابوك والعجـوز الضريـره
شيبانك اللي مـا يبونـك تعانيـن
من بينهم عشتـي كأنّـك اميـره
الحب قبلك هـز نـاس ٍ كثيريـن
خلاّ القلوب تعيـش هـم ٍ وحيـره
الحب يفضح لا انكشف داخل العين
وانتي بنفسـك ماهقيتـك بصيـره
طيعي كلامي واحذري لا تماديـن
تراجعي لاعل فـي الأمـر خيـره
عيشي الطفوله والبراءه لك سنين
وبعدين حبـي لا غديتـي كبيـره
" هذي القصيده جداً أعجبتني وبصراحه تسلم يدين اللي كاتبها "
